بسم الله الرحمن الرحيم
هل أنتي ذكيه تسوقيا؟!؟وشرائيا؟!؟وتخطيطيا؟!؟
قبل كنت أروح واشتري من أي سوق عادي يعني
لكن اختي الصغيره كانت تقول السوق الفلاني غالي حيل
وعلى بالي يبيع المتر والشبر ب2000و3000 آلاف دينار وقتها
كانت بالمتوسط
وأنا بالثانوي تهي تهي
فكنت اتحاشى الروحه له علشان لاأضيع وقتي ووقت المحلات ولاأحر عمري خخ!
وبعدها بفتره
مريت هالأسواق بالصدفه ولقيت أسعارهم نفس الأسعار اللي اشتري فيها وارخص وذوقهم خيال بجد فندمت
إني سمعت كلامها وإن معلومتها جدا طفوليه وماخذتها من رفيجاتها أم 12و13 سنه!
واهنيه اكتشفت غلطتي وإني مالازم اتقيد براي أحد -شعقبه-!
والله يشهد إني ماأحب شوراتها
ودايما تطيحني باحراجات ومقالب بالديره والأ برى الديره خخخ
بس أقول هي تختلط بناس كثير وعارفه أمور ماأعرفها
لكنها تطلع خرطي
فلاتضيعون متعة التسوق بكل سوق علشان كلمة فلانه وعلانه
ولما أحد يحذرج من أسعار السوق الفلاني اسفهيهم وروحي وتمشي بالسوق
لأنه الأسعار اللي ماتناسبهم هم قد تكون أسعار عاديه بالنسبه لج
بس هم يهولون ويبالغون بالتحذير بناءا على عمرهم وجهالتهم وضحالة معلوميتهم
الغالي والرّخيص والّكويس
في الغالب الناس تعجبهم السلع التي لايمتلكون قيمتها
وهذا لاهو عيب ولاهوغلط
لكن توقيت وطريقة حصولهم عليها هي اللي تحدد ذكاءهم وغباءهم التسوقي
يعني مثلا
أنا من خلقني الله اشتري ذهب وأضيع ذهب وأبيع وأبدل عادي يعني
لكن معظم ذهبي عقود اللي هي أطقم القلايد وأساور
وكل مرة جذي
وهذا اللي نسميه الشراء التقليدي !
ولما كنت أشوف ذهب ويعجبني مايطري على بالي اشتريه واقتنيه واكشخ فيه خخخ
مثلا كنت أشوف المحزم على نساوين بالحفلات وأوك وحلو وكله تمام
بس ماطرى لي إني اشتريه نهائي! وللحين مستغربه ليش ماطرالي هالشي
مع إني كنت اقدر اشتريه وكنت ادخر باستمرار
لكن مخي الحلو كان يقولي اشتري سبايك
وأورح وأسوي شوفنق للسبايك وأوزنهاواتراجع عن قراري وهكذا
ولاعمري سويت شوفنق للمحازم ولا من باب الفضول حتى
والحين عقب ماصرفت كل اللي عندي وكل اللي كنت ادخرهم
طرى لي اشتري محزم !
فهذا غباء بالشوفنق والشوبنق خخخ
وطبعا طرالي اشتري حيول اللي هي حجول اللي هي خلاخيل
لكن استحرمت وكل من سولف بالحجول ينصح ويستحرم!
والغريبه إن
العرايس اللي اشتروا والبسوا الحجول صارت لهم
سوالف وبلاوي وطلاقات
فهالشي مؤشر إن الواحد يتحاشاها ويستحرم يشتريها
وصرت استعيض عنها بخلاخل النت والمطلي يأدي الغرض برضو
خطتك في التسوق
افترضي باستمرار إن هناك مناسبه فجائيه وسفره طارئه وزوار الفجأه
وعلى هالأساس تشترين واتسوقين سواء من النت أو أسواق ديرتج
والطريقه:
1)اشتري فستان مناسبه فجائيه مع عدساته ولوازمه
2)اشتري بجايم وفساتين ولوازم سفرات مفاجئه يعني جناط سفر كذا حجم وكذا خامه
(وحددي لهم هم ولوازم المناسبات دولاب خاص فيهم)(الجناط رتبي فيهم العدسات واللوزام من شنط يد وشوزات ووالخ)
3)اشتري ملابس طلعات وملابس تستقبلين فيها زوار الفجأه وعلقيهم بالكبت بحافظات الملابس بكبت لبسج اليومي والطلعات ولوازمهم بكبت)
4)اشتري شهريا قطعة ذهب حتى لوب20 دينار بس
وخلي هالشي طبع من أطباعج
(هذا ادخار ضروري جدا وينفعج بالحل والسفر)
5)ونفس هالطرق اتبعيها بالبخورات ولوازمهم من مبخره وفحم ولايتر والعطورات والميك آب والشنط وأطقم الصوابين السفريه
6)والله كم مره ومره جتني سفره مفاجئه بصبح وليل وظهر وعصروعطلة المحلات فمايمديج اتسوقين ولايمديج تعدلين ملابسج عند خياط والأ اتليه والأمشغل خصوصا لو كنتي قصيره والسوق عن بكرة أبيه كله فري بفري سايز
7)شراء البجايم والجينزات والبلايز والشباشب
هذا خليه موسمي يعني كل 3 شهور اشتري لج كميه كبيره للبيت ونوعي فيهم
والحلو منهم جمركيه بكبت السفرات السريعه
وأظن الأزمه الكورونيه علمتكم فايدة هالطريقه
بس أنا باديتها من سنوات وكولش حلوه
8)حددي عدد المولات والمطاعم والمقاهي اللي ناويه تمشطينها بكل مره
مثلا 5 أسواق منوعه مابين مولات
وأسواق شعبيه وأسواق قديمه وجمله
وموشرط تشترين منها كلها
بس لازم تسوين شوفينق
وتمشطينها
من أرخصهم لأغلاهم مره
ومن أغلاهم لأرخصهم مره
وهكذا كل مره اتسّوقين بأسواق منوعه غير عن اللي قبلهم
فتكونين على اطلاع ومعرفه بكل شي فيهم ومنها سياحه وترويح واستكشاف
وحتى بالسفر خططي لزيارة أسواقها وعالمها بنفس هالطريقه
9)نفس هالأفكار طبقيها مع عيالج وبناتج ودواليبهم
10)بدولاب السفرات والمناسبات حطي لج 20 ديناربجنطة السفر
هوصح ادخار بسيط جدا
بس حزة الحزة بيكون مبلغ محرز ويساعدج بسفرتج وظروفها حتى لو بيساعدج بقيمة صالون هناك وميزة هالإدخار إنه بيساعدج لو معاشج ماوافق تاريخ السفره
ونفس الشي 20 دينار الذهب اللي تكلمنا عنه مساع فهذي ادخارات غشيمه جدا
لكنها بتسندج ماأمكن
لأنكم بالسفر البري
بتحتاجون فنادق ومطاعم ومتاجر طول الخط رايح جاي
غير البنزين وأعطال السياره والذي منه
فلازم تحسبين حساب كل شي مسبقا
11)اهتمي بشراء الفيتامينات والمكملات الغذائيه شهريا ماأمكن
ونوعي فيها كل 3 أشهر
علشان لاتخذلج صحتج بأي وقت لاسمح الله
وتراها أهم من اهتمامج الخارجي بنفسج يعني تغني عن الكريمات والزيوت بشكل جبار وحقيقي ومستمر
12)بجذي تكونين طبقتي التسوق الذكي ونوعتي وادخرتي وحسبتي احساب كل شي بتفاصيله
14)هالطريقه بتضمن لج السعاده والراحه النفسيه
وتخلصج من الكركبه الداخليه والخارجيه
وبتنظم لج حياتج الشرائيه والإدخاريه
خصوصا لوكنتي ربة بيت أوطالبه أوعاطله
الغالي يرخص لج
لو عجبج بخور عود بالوزن
أو دهن عود وغالي حيل
مثلا سعره 300 دينار للتوله و150 دينار لنص التوله و75 دينار لربع توله
فاطلبي منه 1جرام وبيكون سعره 30 دينار
واعتبريها عّينه تجريبه
وهكذا تكونين حصلتي على أغلى نوع عجبج وطوعتيه حسب امكاناتج الماديه
وعموما كل شئ غالي ويعجبج اشتري منه عّينه تسعدج وتخليج تعيشين بامكاناتج من غير لاتحرمين نفسج من شي
وطبعا هالفوكيره ماطرت لي قبل حسااااافه هههه
لكنها طرت لي من فتره ولما طبقتها اعجبتني اكثر واكثر
لدرجة إنه راعي المحل قعد يعرض علينا الغالي كله بنفس الطريقه
وقعد يطقطق بالآله والحسابه بتحسب ههههه
ولوحابه يحطها بغرشه مميزه فاشتريها منه
أو
من أي محل وبيعبيها بالكميه اللي شريتيها
وسلامتكم
تم بحمد الله
ليست هناك تعليقات:
إرسال تعليق