الشرباكه في إخوّة عيال المطلّقين❄️

إذن الحل بالمدارس المشتركه 

فتكون موادها أكثر والدوام من ٧ص ل٧م

والخميس يكون كامبنق🏕ورحلات م✈️

والجمعه والسبت يكونون عند أمهاتهم أوأبهاتهم على حسب 

وبهالحاله يكون وقتهم معظمه مرح وحياه منوعه فتكون المدارس بيتهم الحقيقي🏟بنفس فكرة القريه

واللي ينحاش منهم بعياله يتم تتبعه من 

خلال الكرت 

وهالشي يتطلب تحديد الكاش للمسافرين وكمية المجوهرات 

لأن كثرة الكاش بتساعدهم يعيشون بالغربه فيصعب التوصل لهم 

وبالعطله أسبوع عند الأم وأسبوع عند الأب وتكون السواقه لأمهاتهم اجباريه 

علشان مايتحجج ولاتتحجج بالمسافه 

فتقل القضايا اللي من هالنوع 

دعاوي البدوان ٢

 چََبْحِچْْ⬅️يقابلها بالحضريه چِبَحْ وچِبَحْ هالويه

فهي متطابقه مع إزالة الجيم الأخيره 

وكسر الجيم الأولى 

تِجُوُحْ جُوُحْ طبعا كلكم سمعتوا عن جائحة الكورونا،،،بالضبط هذي هي⬅️فالكلمه رايحه راده على هالمعنى

وتقال استهزاءا  

ع الحرمه الند تعبيرا عن أنها كثيرة الدعاوي على من حولها ههه 

مامعناه إنها مومقننه دعاويها🤢ومعممتها على الكل🥴لأنها تظن الكل عدوانها والعياذ بالله،وهالصفه تكثر في زوجات الأبناء ومرت الأبو بس تكون على فترات وليست دائمه مثل أوقات الزعل والفهم الخاطئ لبعض الأمور والمواقف 

والله يكافينا وإياكم الشر كله 

ولولاحظنا فالدعاوي كلها موجهه من نساء لنساء😅والسبب أنهن يتفادين الدعاء على الأبهات والعيال إلخ لأنهم كقرايب  فهم سمحين كطبع وكطبيعه مع الكل في غالب الأحيان 

وقسوتهم لوفرضناها فهي بسببهن واللي قلناه مساع

                                 تم بحمد الله

✨✨✨✨✨

فافي وعلوم فافي

 بصراحه مالي معاه ذكريات 

لكنها طيف ذكريات

بس اللي أذكره إني كل مادخلت الديوانيه 

ألقاه يصلي واللي أسمعه من صلاته وص وص وص هههه

وأذكر إنه يعبي الثلاجه كراتين من كل شي مااذكر منه شي🥳

ومره سمعته وهويم الثلاجه يوصي وحده من خواتي علي🤢

ومن سوالف اللي حولي عنه إنه راعي حلال وإبل ورعيان وإن الوضح من للشارع للشارع 

واللي تقول عنده محلات خخخ

ويقولون إنهم كل فتره يصادفون عيال اللي شراهم 

وإنه هو والشاعر فلان ربع

بس اللي أنا وعيت عليه لايمت للهالكلام بصله هههه 

ولاكنا ندري إن لنا شي اسمه ورث الأ يوم صرت بال٢١قالي أخوي إنهم دقوا يبوني استلم ميراثي 

زين والتقشف اللي كنا فيه ههه

والأجارات اللي مرت الأبو تاخذ نصها شهريا مع إن اللي حولي قالولي إن فافي ط موالطاء اللي الكل عارفها لاء طا الثانيه🤭

غير إنها كانت تاخذ نص التقاعد 

ولـ هالسبب كنت أقول لازم الكل يدرس أساسيات القانون علشان الكل يعرف اللي له واللي عليه 

وسوالف الورثه ماتنفع نهائي 

والدليل للحين يعانون من بعض ومن جهلهم بكل هالأمور 

يعني شنو أعيش بتقشف لين يصير عمري ٢١⁉️

والسنين اللي قبلها ماكنت أحتاج حياه كامله بتفاصيلها ومصاريفها⁉️

أنا والله انصدمت وكان ودي أكتب شي من وقتها بس كان عدىّ الوقت وكان حبري امخلص😂

يعني اليتامى مايعرفون شنو لهم وشنو مولهم من بيت من حلال من أسهم من محلات إلخ 

وهالجهل يخلي الكل يقص عليهم🥶ويتحكم فيهم وبحياتهم الماديه 

فالأمور كانت كل من إيدو إلو🤪

وبسبب هالشي ماكانت حياتنا طبيعيه 

يعني عشنا بقهر إيه تحكم إيه ضياع أمنيات إيه وكل شي ضدنا إيه 

علشان جذي لاتستغربون لما تسمعون ببرامج التواصل يتيمات يشتكون إن تقاعد الفافي مايكفي لشي 

لأنهم في الغالب  معاناتهم بتكون قريبه من هاللي قلناه كله 

وقيسوا على ذلك مرت الأبو والعم والإخوان وزوجاتهم 

أساسا حتى قروض الترميم ماعرفناها الأ تو⁉️وللآن ماعرف تفاصيلها 

هذا غير التوكيلات والتنازلات الجبريه 

وشيصير مايصير قبلها وبعدها‼️🤯‼️

وعلى قولتهم هذا غيض من فيض🥴

وعلى طاري التوكيلات 

مره كنا رايحيين درب المحاكم 

والكل قاعد وينطر دوره 

الأ أشوف مره ثقيله وروعه بمعنى الكلمه 

ومامداني أتساءل بيني وبين نفسي إش جايبها اهنيه 

الأ أشوف طفل إن كثرت بعطيه ١٦سنه وقاعد يقولها الأ تكتبين لي توكيل ولاتفشليني وكني سمعتها تقول ياوليدي 

هذا حلال أبوي موحلال أبوك 

وهومصمم على رايه 

يعني واحد بعمره إش عرّفه بسوالف هالتوكيلات والطمع وهالأمور 🥴

ومن وقتها تمنيت لو يلغون سوالف هالتنازلات وهالتوكيلات نهائي 

وأقلها ألغوها إذا تمت سنتين علشان الوحده ماتكون تحت رحمة الإخوان والعيال وماشابه للأبد

وفيه بعد إنه ليش بيت الورثه يصير للصغير  وبس ومايحق له يقدم على أرض 

وقرض حاله من حال عيال جيله  وشنو مصير الخوات والأمهات اللي ساكنين معاه بهالحاله⁉️ 

الطامه الثانيه 

الخوات الأرامل وكلهم جدات 

يشاركون القصّر وخواتهم من أبوهم بالتقاعد ههه

يعني معاش التقاعد چنه علبة ماكنتوش موتقاعد هههه 

فالمفروض اليتامى من يتيتمون يكون بإيد كل واحد منهم كرت بنك بإسمه 

علشان يصرف على نفسه  ومستقبله  بضمير🥳

وأصلا مايقدرون يقترضون من ذاك اليوم ليـ هاليوم 

اذكر من تخرجت رحت البنك آخذ قرض علشان أكمل دراستي برا بس مارضوا 

وعذرهم إن التقاعد بإسم الفافي 

يعني مافيه شي بإسمي رغم إنه موموجود بالوجود‼️

وكل كم سنه أروحلهم ونفس الشي‼️‼️

وآخرها من كم شهر‼️

وأنا لما اطلب قرض أكيد حاسبه حسابي إني أقدر أسدد ويمكن أسرع من الباقين😶

فياريت هالأمور اتعالج بشكل جذري 

علشان اللي عنده طموح بدراسه وحياة

تكون الأمور ميسره بوجهه 

وياريت أي أموال لهم تستثمر بأساميهم 

وتنزل في حساباتهم شهريا ومن هالوقت لين يوصل عمرهم٢١ مايعانون هالأمور وهالناس وغثاهم نهائيا وبعدها سلموهم ميراثهم 

والوجه من الوجه أبيض✨

ذكريات الطعش

هذه القصص لاتمت للخيال بصله🥳

بأواخر المتوسطه خيرونا مابين الثانويه العامه والمقررات وقالوا لنا الفرق بندوه شامله صفوف رابعه متوسط كلهم 

وكنت مقرره أروح مقررات علوم لكن وحده الله لايمسيها بالخير من صديقاتي 

أجبرتني على العامه وإنها أحسن وشبي بالمقررات ومن هالجچی وقد كان لما وزعوا علينا الأوراق إخترت العامه😳

✨✨✨✨

بأولى ثانوي كنت مشغوله بالكتب والدواوين والمجلات وكانت هواياتي كثيره وكل يوم والثاني اشتري كامره وكل يوم والثاني اشتري كتلوج ألماني تعليمي لتصميم الأزياء وأخوي يجيب لي لوحات وألوان وأرسم وختمت موسوعات علميه 

والدنيا كانت تمام وكنت من ال١٠الأوائل مع إني مومهتمه بالمذاكره أصلا 

وفي يوم أغبر وبحصة الرياضيات تحديدا 

تغريد هانم قاعده تشرح لنا بأسلوبها البارد كلمتني وحده من البنات وقالت لنا تغريدوه ماتتكلموش في حصتي 

وأنا نسيت هالموقف لكن هي عيّدتنا السنه وطبعا إنهرت وطفت روحي وأظلم الكون بعيوني يعني المقررات راحت علي ومعاها عيّدوني السنه على٧٣٪؜😢

وطبعا عيّدوني إياها على درجه وحده بالرياضيات🤭

لاومن البجاحه الناظره إلحقتني  ودشت صفي عقب ماعدت السنه وتسلم علي 

وتسولف معاي والمدرسه تشرح🤢

وعدت الأيام ورحت ثانيه ثانوي ورفايجي كلهم راحوا ثالثه علمي🥺

وصار الغزو وهذا ذكرياته يبي لها موضوع بروحه🥳

المهم ردينا للدراسه وأول أو ثاني يوم 

إختي كانت توها داشه أولى ثانوي ويمكنها اتعبت ونادوني ودشيت غرفة الناظره اللي هي فيها وواقفه بعيد ولاأبي أقرب من الناظره 

الأ إنها نادتني وقالت تعالي سلمي 

ماتبين اتسلمين⁉️ورحت صوبها وسلمت عليها وقعدت تسولف لإختي وتقول لها إني شاطره وياحرام البنات راحوا لثانيه ثانويه بأقل من نسبتها ومن هالحچي🤢

وبلحظتها حسيت اشكثر انظلمت 

وهي ولاعلى بالها إنها شاركت بظلمي 

وعلى كثر ماكنت أحبها الأ إني كرهتها عقب موقفها اللي أكد لي إنظلمت بهالثانويه التعيسه🥴

✨✨✨✨✨

من قبل لاأروح للثانوي بسنوات كنت مخططه أروح بريطانيا وأسس حياتي هناك فكنت مخططه أدرس هندسه وراثيه وأكمل للماجستير وخلال سنين الدراسه كنت مقرره أألف كتب علميه ونظريات وأكتب مقال أسبوعي وأسس معهد أبحاث ومركز إستشاراعالميه وعامه 

وكنت مخططه لنوعيات الأبحاث مابين دوائيه وتجميليه وكنت مخططه لتطبيق 

نظريات دوائيه ببالي لحالات الإعاقه 

وقلت انشغل بكل هالأمور لين أوصل ال٢٥أو٢٧بالكثير وبعدها أرد وأرتاح 

لكن غلطتي اللي عطلت كل هالأمور إني كنت مقرره أدرس على حسابي😂ومعاها كل هالأمور لازم تكون على حسابي🥴

✨✨✨✨

الثمانينات زمن عيّا الزمن ينتهي به

والله ماجا ببالي إن الثمانينات بتنتهي بيوم من الأيام ولاكان عندي ظن إن الزمن 

بيمشي لزمن ثاني 

وكانت فتره فيها الأعاجيب بكل مافيها من تفاصيل 

كانت دنيا المكاشيت والحياه ماتوقف فيها 

والوقت كله مزدحم ضحك ومواقف 

وعلى هذا هقيت إني بكمل الزمان الجاي بالثمانينات لآخر لحظه بعمر الزمان

وأسوأ مافيها كان أخوي راعي اللوحات😂

هوفيه مزايا كثيره لكن طريقته وأسلوبه وتدخلاته بحكم إني إخته من أبوه خلاني أبعده من حياتي للأبد🤢

✨✨✨✨✨

طبعا سنين الطعش كلها صداقات من كل قبيله ومن كل دوله ومن كل مله 

والصف فيه المسيحيه واللبنانيه والعيميه إلخ واللي ماأصادقها هي بنفسها تصادقني🥰

وبعدين لاحظت إنه قطعتنا نفس الفكره 

بيت حنا وبيت موحنا😜وعلى هالأساس 

قست باقي الدنيا اللي حنا فيها

والصدفه اجمعتني ببعضهم أيام الكليات 

لأني اسم الله علي دشيت معظم الكليات إذا موكلها😂وكانوا يعزموني على مناسباتهم ومازادتهم الأيام الأ طبيه وغلا

✨✨✨✨

أغرب صدفه في حياتي هذيك الأيام 

إني كل مارافجت وحده اكتشف إن أبوها مطوع مع إنها مومتحجبه وللتسعينات  كانت الدنيا كلها ماللحجاب طاري في بالها وكانوا أبهات سمحين 

واللي أبوها مومطوع يكون أخوها مطوع 

✨✨✨✨

طبعا كانت ثالثه ورابعه سنة الدمج ودرستهم مع بعض وكانت الأمور ماشيه وكنت أجيب الفل مارك والتسعينات حتى من غير مذاكره لدرجة إن البنات يقولون إنتي اخبيثه وتذاكرين من ورانا ولااتعلمين🤪

وين الصدمه⁉️

كانت الصدمه لماتذكرت كلمة راعي اللوحات أخوي يوم قال مافيه دراسه وكان يهدد ويرعد😤

اهنيه أنهيت مستقبلي بإيدي وانهرت وأنا بسرعه أنهار وماكان عندي أحد يوقف معاي أوحتى يوقف ضده

وماذاكرت للثانويه العامه وجبت نسبه أقل من أي توقع ولما أعلنوا النتايج 

أول وحده دقت علي رفيجتي تلومني وتقول شهالنسبه وتوني مافقت من الصدمه 

الأ دش راعي اللوحات يلومني وشـ هالنسبه اللي جايبتها وصديت عنه ولاقلت شي 

ودشيت كليات  التطبيقي وحده ورى الثانيه وكان أخوي الصغير يقولي عيدي الثانويه وادخلي الكليه اللي تبين لأنه كان شايفني منهاره  ولأنه كان يوديني ويجيبني فكان حاس فيني لكن ماكان فيني حيل أعيد الثانوي وقررت وقتها أستلم الشهاده وأقعد ف البيت🤢

ونفس الشي مع إختي الصغيره كانت تبي تكون محاميه وعيا ودشت تطبيقي رياض أطفال

✨✨✨✨

ومع الأيام اكتشفت إن اللي يبي يحلم لازم يعلي سقف أحلامه لأبعد مدى علشان لو الدنيا عاندته وماوصل لأكبر أحلامه فيمديه يوصل للأقل منه بدرجه ومايكون خسر شي 

يعني الوحده بدال لااتمنى هندسه المفروض اتمنى طب علشان لوصار ماصار والنسبه والشروط خانتها فيمديها تدش طب مساعد وصيدله وهندسه 

فيكون فيه نسبة نجاح مابين أمنياتها والواقع اللي انفرض عليها

✨✨✨✨

طبعا كانت الطعش أيام المدينه الترفيهيه 

والمطاعم وكل يوم نشوف بقطعتنا مطعم جد

وقبل إذا أحد منا مرض وودونا المستوصف يرضونا بالمره بفلافل وڤيمتو ههه

وكان كل شي مميز  

المهم بيوم العوايل إخواني ياخذوني معاهم علشان يسمحون لهم يدشون هم وربعهم 

ويخلوني قاعده بحديقة المدينه لين يخلصون وبعدها يقصون علي بأي لعبه ههه 

✨✨✨✨

وكان واحد من خواني يحب التقحيصات 

والعود وكان يمشي بشارعنا من تحت الشاحنات أيام البقيات 

ومنه حبيت عالم السيارات 

وكانت قعداته تونس وخفيف ظل 

✨✨✨✨

بصراحه هذي أطول طعش مرت على الدنيا😂

المهم إخواني تزوجوا وأنا بالطعش 

وجاهم عيال وأنا بالطعش 

وواحد منهم طلق وأنا بالطعش

ورد وتزوج وأنا بالطعش

ورد وتطلق وأنا بالطعش 

ورد وتزوج وأنا بالطعش

وصار الغزو وأنا بالطعش

وقعدنا بالسعوديه شهور وأنا بالطعش 

واحترقت الآبار وأنا بالطعش 

وتجمعت دول التحالف وأنا بالطعش 

وصار التحرير وأنا بالطعش 

وردينا للكويت وأنا بالطعش 

ودرست وخلصت المتوسط والثانوي والكليه وأنا بالطعش😂

والدنيا قايمه قاعده وأنا بالطعش😂

✨✨✨✨

بالمتوسط كان مصروفي ربع دينار 

ولمارحت الثانوي عطيت نفسي ترقيه وخليته نص دينار هههه

✨✨✨✨