بسم الله الرحمن الرحيم
كنت فيما مضى أخطط وأخطط وأخطط
وكانت الإمور ماشيه حلاوه ماديا وعائليا
وكنت حامده الله وشاكرته
الأ إني بالأوقات الأخيره
اكتشفت حجم اللخبطه في بعض هالخطط
مثلا على الصعيد العائلي أخوي وزوجته هم قرروا انّا نسكن مع بعض
في طابق واحد
وأنا ماقلت لاإيه ولا لأ!
مع الأيام اكتشفت إني المفروض
قايله رايي من البدايه وإن هو وزوجته المفروض لهم طابق
واحنا بطابق
ونفتك من الحنه والرنه والظيطه والظمبليطه ههه
وللأسف هالشي سبب مشاكل الكل في غنى عنها
على مدى سنوات
واللي بقوله لكم ياإخوان وياخوات وياأبهات وياحريم الأبهات
اللي بتتزوج منكن أومنهم
مانبي منكم شي
غير إنكم تسكنون ببيوت مستقله وتطبقون كلام الشرع بالهنقطه تحديدا
أما إنكم تسكنون زوجاتكم مع خواتكم
فوالله منتم لاقين غير الذنب والحسره
يعني لاإنتم راح اتهنون ولاخواتكم بيرتاحون
وسوالف الحريم بتردكم قَرِي وبتحرمكم سعادة الدارين
هذا الواقع بعيدا عن أي مثاليات
ولاتنطر لما مرتك تطلب ولإلما خواتك يطلبون
المفترض تكون حازم من البدايه ولاتخلط الأوراق ببعضها
والخوات والأمهات بطابق
والأخو ومرته بطابق
ونفس الشئ مرت الأبو
لأن الحريم خوافات
سواء خوات أوزوجات
فيخافون يطلبون منكم بيوت وطوابق مستقله
الخطه رقم 2
البيزات ,,,
طبعا دايم عندي خطط ادخاريه سنويه وهذا شي ضروري بحياة الكوحيتي ههه
لكن للأسف اللي ادخره من صوب أرد اصرفه من صوب وهكذا
ومع الأيام تغيرت الأمور اشوي
وقل الراتب اشوي
ولحظتها تحسفت على كل هالخطط الإدخاريه
وتمنيت لوكنت حاطه هالمبالغ بأراضي وبيوت بأي بلد خليجي أكيد
وللأسف الخطط اللي أجلتها وحطيت لها بدائل من مخي
هي الخطط الأنجح على الإطلاق
وراح أقولها لكم وطبقوها حتى لو شهر وترك المهم واصلوا واستمروا
1)نفرض راتبج 400 دينار ولاعندج مسؤوليات
تمام
2)ادخري شهريا 100دينار بحسابج
و100 خليها ذهب
و200 مصروفج
والزايد منه للحصاله
3)بجذي سنويا بيكون بحسابج 1200 دينار
وبطاسة ذهبج 12 طقم صغير
4)وسنه بعد سنه بتزيد ثروتج البسيطه هذي
5)وحاليا جرام الذهب فوق 16 دينار يعني لو بعتي ذهبج بهالأوقات بتحصلين مبلغ
وقدره وتضيفينه لحسابج وتشترين فيه بيت وتأجرينه بأي بلد
6) حاولي سنويا استثمار مدخراتج بالأراضي والعقار
والأ بتصرفينهم بغمضة عين ومن غير لاتحسين أصلا
أما الخطه اللي اتبعتها أنا وزدت الطين بله فهي
1)كنت أحط الراتب مع المدخرات اخليطي بالكبت اللي هو الدولاب
2)وكنت كل مابغيت اشتري شي آخذ منهم ولاأكلف نفسي حتى بالسؤال
ولاأقول هل هالفلوس من الراتب أو إنها من المدخرات!؟
وچني ضيفه على نفسي انحرج اسألها وانحرج أحاسبها خخ
3)ماكنت أعدهم الأ من نص سنه لنص سنه أوأقل بشوي
4)ولما أعدهم اهنيه تبدا الصدمه !!
واكتشف إنهم ماقاعد يزيدون ولكنهم كل مالهم ينقصون خخخ
لييييييييين جت أزمة كورونا وصار حظر التجول فماصرت أروح اسحب ولاشي
فكنت اصرررف من هالمدخرات واصرف على طلبيات النت
لييييييين بح خلصت هالمدخرات تماما
وعطيت أخوي الكرت وسحب لي رواتبي بعد ماخلص الحظر
وايضا صرفتهم على تجديد غرفه وهالسوالف
وطبعا هذي اكبر غلطه بحياتج الإدخاريه
وهي إنج تخلطين مصروفاتج بادخاراتج بمعاشاتج
لأنج بتصرفين عمياني وبليا حساب لين تقضين عليهم
فلازم تكون مصروفاتج بمكان ومدخراتج بمكان وذهبج بمكان
هالشي بيضمن لج نجاح خطتج بدال لاتكررين غلطتي الحمقاء بحذافيرها
وطبعا كلامي لراعيات البيوت أو على قولتهم ربة منزل ولغير الموظفات
الخطه رقم3
اني ماعودت نفسي على الصلاة نهائي
مع إني كنت أحط خطط وأمشي عليها
مثلا إني أتوضا طول الوقت
وإني أصلي كل ماتوضيت
وواضبت على هالشي فتره
لكن كنت أصلي ركعتين لله
لاهي فرض ولاهي من ضمن الصلوات
فهذي غلطه فادحه
وهي إني اترك الفروض وأقعد أألف لنفسي مبررات !
علشان اشجع نفسي ع الكـ سل والمزاجيه
لكن إن شالله بحاول اصلح غلطاتي ومكامن نفسي باللي اقدر عليه
ومرات تقول لي نفسي تايم آوت وليش ماصلحتي غلطاتج قبل ووش بقى من العمر الخ من هالكلام
لكن بداخلي عزيمه قويه إني اتغير
وهذا أحسن طبع لقيته فيني
إني أحب اتغير للأحسن باستمرار
وإني اذا وعدت نفسي أوفي بوعدي معاها
وعامة دايما الشخص حلو وهو بروحه وأموره وأعصابه تمام
لكن لما الحياه تحاوطه بناس مابينه وبينهم تقارب بأي شي
ويستفزونه باستمرار
فاهنيه يضطر يظهر لهم بأسوء مافيه
وسلامتكم
تم بحمد الله
ليست هناك تعليقات:
إرسال تعليق