بسم الله الرحمن الرحيم
كلامي موجه لكل أنثى
في حياتك
تمر عليك آلاف المواقف من يتم وطلاق ومشاكل كثيره
وفي كل منها تتمنعين شيئين
إما انك تملكين بيت وفلوس وتبعدين عن هالمشاكل واللي سببوها
أو انك تهاجرين لأي بلد وهناك بتحفرين الصخر علشان لقمة العيش ودفع الايجار والفواتير والغرامات
وأكيد لاحظتوا بالفتره الاخيره هروب البنات عن أهاليهم وبعضهم تختار الابتعاث والتخصص الصعب علشان تبعد عنهم أطول مده من حياتها
اذن ماهو الحل ؟؟؟؟
الحل بالفلوس وادخار الفلوس
فلوكنتي تشتغلين أو عندك راتب أومهر وذهب أو مشروع أوقطيات(اللي يسمونها جمعيات)
فادخري قيمة بيت بأي بلد
علشان لوقررتي تسكنين بروحك
فتكون هالفكره خير معين وخير سند لك
وطبعا ياما مسكتوا مبالغ واحترتوا فيها وطيرتوها على أسواق ومطاعم
وبعدها ندمتوا لأنكم طيرتوها
لكن
لوفكرتي بواقعيه اكبر وبنفسيات المحيطين وبراحتك واعصابك
بتكتشفين ان امتلاكك لبيت لو طابق واحد هو كنز الكنوز
لكن لو صرفتي أول بأول ومر الوقت من غير لاتدخرين أوتمتلكين قيمة بيت
فهذا افلاس حقيقي مادي ومعنوي لانك بتضطرين اتحملين هالنفسيات والعالم المرضى
لأنك هشه ماديا ولاعندك شي يسندك ويبعدك عنهم
وللي عندها قيمة بيت
سواء طابق واحد
والأ
طابقين
والأ اكثر
لاتضيعين الفرصه
واشتريه من الحين وأجريه لوحابه
المهم انك تمتلكينه طالما قيمته متوفره عندك وقبل لاتطيرينها على أشياء بلاطعمه
والله واقولها بكل صراحه كم مره ومره توفر بايدي مبالغ تجيب بيت
وأهلي كانوا ينصحوني اني اشتري فيها بيت أو أراضي ببلد ما وكل فتره تنعرض علي بيوت وأراضي من فلانه وفلانه
لكن كنت اطيرها على الاسواق والحين ندمانه جدا
فانتي ابدئ حياتك الماليه بشراء بيت أولا وخلي التسوق والأسواق ثانيا وثالثا
لأن السوق موطاير لكن فلوسك هي اللي بتطير وتندمين على هالفرصه اللي مااستغليتيها
واقري عن المشاكل النسائيه وهي كالتالي:
-اللي ساكنه مع أهل زوجها وتبي بيت مستقل وماعندها قيمته
-واللي مطلقه وأهلها مايبونها هي وعيالها تسكن عندهم
-واللي معلقه ولايبيها زوجها ولاأهله ولاأهلها
-واللي أرمله
-واللي مومتوظفه
-واللي معنفه
-واللي ساكنه عند الاخوان وحريم الأب
-واللي مسروق ميراثها وذهبها
-واللي مومتفاهمه مع أهلها
-واللي زوجها بالسجن أو مديون أو مفنش أو مريض
الخ الخ
-فلو كل وحده منهم
عندها بيت أو قيمة بيت چان ارتاحت وريحت ههههه
عندها بيت أو قيمة بيت چان ارتاحت وريحت ههههه
الشي الثاني لاتكتبينه باسم أي أحد لاأب ولاأخ ولااخت لأنه بيصير ملكه رسميا
وانتي مايحق لك تطالبين فيه بعدين
لأن العبره بالأوراق الرسميه وبس
ونفس الشي التوكيل والتنازل
لاتكتبين لأي أحد لأنها بالنهايه بتحرمك من حقك بالميراث والسكن ومن كل شي
وبالإمور الماليه حاولي تكونين أنانيه جدا علشان محد يخدعك أويستغلك وبعدها يشوتك
تم بحمد الله
ليست هناك تعليقات:
إرسال تعليق